GORBEIALDEAKO NEKAZARI ETA ABELTZAINEKIN TOPAKETA
Joan den azaroaren 12an, Mairuelegorreta Landa Garapeneko Elkarteak topaketa bat egin zuen Gorbeialdeko nekazaritza eta abeltzaintza sektoreko ordezkariekin Murgiako Eztiaren Museoan. LGEak eskualdean bultzatzen duen lana aurkezteko, Gorbeian RuralTxa proiektuaren aurrerapenak partekatzeko eta ekoizleen beharrak, kezkak eta proposamenak bertatik bertara jasotzeko balio izan zuen saioak.
Hainbat sektoretako abeltzainak izan ziren jardunaldian, hala nola esnetarako ardiak, erlezaintza, esnetarako ahuntzak, haragitarako behiak, esnetarako behiak eta baratzezaintza sektoreko profesionalak gerturatu ziren. Honi esker, sektorearen ikuspegi zabala eta plurala lortu ahal izan zen.
Mairuelegorreta Landa Garapeneko Elkartearen lanaren aurkezpena
Topaketan, LGEko talde teknikoak sektoreari eskaintzen zaizkion zerbitzuak eta jarduera-ildoak azaldu zituen, baita nekazaritza eta abeltzaintzako jarduera dibertsifikatzeko laguntzak ere. Era berean, Landa Garapeneko Eskualde Programa berria (LGEP) aurkeztu zen, azken hilabeteetan egindakoa. Ardatz estrategikoen artean, elikaduraren balio-katea nabarmentzen da. Eremu horretan, nekazaritza eta abeltzaintzaren sektoreak funtsezko eginkizuna du lurraldearen garapen ekonomiko eta sozialerako.
RuralTxa proiektuaren aurrerapenak Gorbeian
Halaber, Gorbeiako abeltzaintza estentsiboaren errebalorizazioan oinarritutako RuralTxa proiektuaren aurrerapenak partekatu ziren. Proiektuak diagnostiko bat garatu du habitaten kontserbazio-egoerari buruz eta horiek mantentzen laguntzen duten abeltzaintza-jarduera tradizionalen testuinguru sozioekonomikoari buruz.
Ekintza praktikoen artean gauza ezberdinak egin dira, habitatak lehengoratzeko lanak, belar-sastrakak kentzea, abeltzaintza estentsiboari eta produktu deribatuei laguntza ematea, herri-mendietako hesi birtualen proba pilotuak eta herritarrei zuzendutako sentsibilizazio-jarduerak.
Nekazaritza eta abeltzaintza sektorearen ekarpenak eta lehentasunak
Topaketak hainbat ekarpen biltzea ahalbidetu zuen, sektorea indartzen jarraitzeko. Identifikatutako premien artean, hauek nabarmentzen dira:
- Hobekuntzak ustiategietako hondakinen kudeaketan
- Aurrerapenak mendien eta herri-eremuen kudeaketan
- Ekoizleentzako topaketa- eta merkaturatze-guneak sortzea
- Beste eskualde edo lurralde batzuetan izandako esperientzia arrakastatsuetara bisitak antolatzea
- Nekazaritza eta abeltzaintzako jarduerari balioa emateko mekanismo berriak bultzatzea
- Sektoreari buruzko jardunaldi tematikoak egitea.
Mairuelegorreta LGEk nekazaritza eta abeltzaintza sektorearekin batera lan egiten jarraituko du behar horiei erantzuteko eta Gorbeialdearen etorkizunean bere zeregin estrategikoa indartzeko.
Eskerrak eman nahi dizkiegu topaketan parte hartu zuten ekoizle guztiei. Haien konpromisoa eta ekarpenak funtsezkoak dira dena posible izan dadin.
Eraikitzen jarrai dezagun!